Page 12 - Jafnrétti - Ritröð um grunnþætti menntunar

JAFNRÉTTI
10
félagsleg og efnahagsleg kjör eða börn og unglinga sem á einhvern hátt skera sig
úr hópnum. Þetta á við um allt starf í skólanum.
Rétt eins og í aðalnámskrá er í þessu riti lögð áhersla á skóla án aðgreiningar,
að hverju barni og ungmenni finnist því vel tekið í sínum skóla. Markmiðið er
að allir eigi raunverulega hlutdeild í skólastarfinu, taki þar virkan þátt og búi
við jafnrétti, hver svo sem aldur, félagsleg staða, uppruni, kyn eða lífsskoðun
þeirra kann að vera. Markmið skóla án aðgreiningar er ekki síst að skoða
hvernig stofnanir, stefnur, menning og uppbygging skóla styðja við eða draga
úr kerfisbundnu misrétti og viðurkenna fjölbreytileika. Stefnan byggist á þeirri
hugmynd að menntun sé réttur allra og að það sé samfélagsins að tryggja öllum
menntun við hæfi. Skóli án aðgreiningar á í reynd að vera sáttmáli um réttlátt
samfélag.
Ríkjandi hugmyndafræði
Jafnréttismenntun felur í sér greiningu og gagnrýna athugun á viðteknum
hugmyndum í samfélaginu og stofnunum þess. Kenningar og hugtök hjálpa til
við að koma auga á hvar ójafnræði kann að leynast.
Skóli margbreytileikans samkvæmt Booth og Ainscow (2002) leggur áherslu á að
• börn, unglingar og starfsfólk séu öll í sömu metum og að virðing einkenni allt
skólastarfið
• auka þátt barna og unglinga í að móta námskrá, skólamenningu og skólasamfélag
• skipuleggja upp á nýtt stefnu og starfshætti og móta menningu sem fagnar
margbreytileika
• draga úr hindrunum í námi og leik, ekki aðeins fyrir börn og unglinga sem glíma
við skerta getu eða hafa sérstakar þarfir, heldur öll börn og ungmenni
• læra af reynslu þeirra sem þurfa að yfirstíga hindranir hvað snertir aðgengi og
þátttöku í skólastarfinu þannig að hægt sé að gera breytingar sem koma fleirum
að gagni
• líta á margbreytileika meðal barna og unglinga sem tækifæri fremur en vandamál
sem þurfi að yfirstíga