Page 9 - Jafnrétti - Ritröð um grunnþætti menntunar

Grunnþættir menntunar
7
Fjallað er um 1) kyn, kynhneigð og kynvitund; 2) menningu, þjóðerni,
tungumál, trúarbrögð og lífsskoðanir; 3) fötlun; 4) aldur og 5) stétt og búsetu. Í
þessu felst sú hætta að lesendur hneigist til að líta á jafnréttismál sem sundurlausa
búta en ekki eina heild. Meginkostur aftur á móti er að á þennan máta er hægt að
halda utan um þessa þætti, skerpa sýn á þá og rýna til gagns. Í námskrá er lagt til
að beita ákveðnum gleraugum við þá rýni og vísað til nýrra fræðigreina á borð
við kynjafræði, hinseginfræði, fjölmenningarfræði og fötlunarfræði. Við munum
í ritinu styðjast við nýja þekkingu sem þessar greinar hafa fært okkur og í stöku
tilvikum fella nöfn fræðimanna og ártal verks inn í textann. Heimildaskrá er að
finna aftast í verkinu.
Höfundum er fullljóst að sumar uppástungur að verkefnum í heftinu eiga ekki
við öll skólastig. Breiddin í barna- og unglingahópnum er mikil og þegar vísa þarf
sérstaklega til þeirra sem eru í yngri eða eldri kantinum, höfum við valið að fara
þá leið að tala um börn annars vegar og um unglinga hins vegar. Þar er líka haft í
huga að í leikskólum er venjan að tala um börn en ekki nemendur.
Stundum eru dregnar upp ákveðnar línur og lýst sterkum viðhorfum.
Að sjálfsögðu er ekki þar með sagt að sýn höfunda sé óumdeild og að önnur
sjónarmið geti ekki átt betur við. Við gerum ráð fyrir að viðhorf okkar veki til
umhugsunar og umræðu og teljum að þá sé til nokkurs unnið. Við vonum að
lesendur geti sótt í þetta hefti hugmyndir og spurningar, þanka og vísbendingar
sem verða þeim að gagni hvar sem þeir starfa að uppeldi og menntun.